Gëzuar Vitin e Ri 2026

GËZUAR VITIN E RI 2026

Klubi Kombëtar Shqiptar i Motoristëve SHQIPONJAT
uron të gjithë anëtarët e vet për Vitin e Ri 2026. Klubi ju uron shëndet të mirë dhe sa më shumë kilometra të përshkuara në vitin që po hyjmë.

Viti që lamë pas ishte një vit i mbushur me aktivitete, takime, rrugëtime (route) dhe turne të ndryshme. Sezoni i vitit 2025 filloi me mbajtjen e Mbledhjes së Përgjithshme të klubit më 9 mars, ku u bë një rekapitulim i të gjitha aktiviteteve dhe ngjarjeve gjatë vitit 2024, si dhe u shpalos programi i klubit për vitin 2025.

Më 14 prill u organizua takimi i klubit nga Rajoni VD/GE. Përkundër motit të ftohtë, në këtë takim morën pjesë shumë motoristë nga të gjitha rajonet. Rruga e motoristëve kaloi edhe në Lozanë, pranë liqenit, ku spontanisht hodhëm vallen shqipe, duke mahnitur të pranishmit që ndodheshin aty në ato çaste.

Më 4 maj, me një numër relativisht të madh, morëm pjesë në “LOVE RIDE SWITZERLAND 2025”. “Love Ride Switzerland” është ngjarja më e madhe bamirëse në skenën zvicerane të motoristëve. Të ardhurat e gjeneruara shkojnë tërësisht në dobi të personave me sëmundje muskulore dhe aftësi të kufizuara. Numri i madh i pjesëmarrësve me simbolet e klubit SHQIPONJAT shtoi kureshtjen dhe admirimin e qytetarëve përgjatë gjithë itinerarit.

Duke filluar nga 24 maji, një nga ngjarjet më të rëndësishme të klubit ishte Turneu i Rajonit BE/SO/FR në Kosovë, për nder të përvjetorit të Operacionit SHIGJETA të UÇK-së në Pashtrik, si dhe turneu tjetër i organizuar nga Rajoni BS/JU në Kosovë, Shqipëri dhe Maqedoninë e Veriut.

Të dy grupet qëndruan deri në 10 ditë, duke vizituar shumë vende me rëndësi të veçantë në trojet shqiptare, veçanërisht mikpritjen nga MK Veteranët e UÇK-së dhe përcjelljen e tyre në ngjarje, si dhe duke bërë homazhe në vendet ku prehen dëshmorët çlirimtarë.

Më 7 qershor, disa anëtarë të klubit morën pjesë në takimin e Albanian Bikers në Shijak të Shqipërisë. Edhe aty u dalluan ngjyrat kuq e zi të klubit kombëtar.

Më 22 qershor u organizua takimi i radhës nga Rajoni SG/TG, me ç’rast Shoqata Kulturore-Artistike “Sharri” organizoi një koncert të larmishëm me këngë dhe valle tradicionale.

Më 1 gusht ishim mysafirë te klubi vëllazëror Plisat, ndërsa më 7 gusht morëm pjesë në tubimin e madh popullor të organizuar nga shoqatat e dala nga Lufta e UÇK-së, me moton “Liri për çlirimtarët”. Protesta kishte për qëllim tërheqjen e vëmendjes ndaj padrejtësive që po u bëhen çlirimtarëve nga Gjykata e Hagës. Motoristët tanë do të marrin pjesë edhe në protesta të tjera në mbështetje të UÇK-së.

Më 10 gusht, motoristët tanë ishin të pranishëm, me ftesë të klubit Dardanët, në takimin e Skenderajt.

Më 31 gusht u organizua takimi i radhës nga Rajoni BS/JU. Në këtë takim morën pjesë një numër i madh motoristësh nga të gjitha rajonet. Pjesëmarrja e madhe bëri që të bllokohej një pjesë e konsiderueshme e lagjes për të sistemuar të gjithë motoristët.

Më 14 shtator, në protestën “Protesta vazhdon në Hagë”, disa anëtarë të klubit përcollën zërin e klubit në mbështetje të kauzës së shenjtë, duke kundërshtuar Gjykatën e Hagës. Me këtë rast, klubi ynë dërgoi një telegram mbështetjeje për organizatat e dala nga Lufta e UÇK-së.

Më 28 shtator u organizua takimi nga Rajoni BE/SO/FR. Edhe në këtë takim, përkundër motit të freskët, mori pjesë një numër i madh motoristësh.

Më 16 tetor, në Tiranë, disa anëtarë të klubit morën pjesë në mbështetje të Protestës Gjithëkombëtare.

Në Karavanin e Marshit “Liria ka Emër”, më 18 tetor, klubi ynë u përfaqësua nga një ndër anëtarët më të devotshëm.

Më 14 nëntor, në protestën “Aty ku filloi padrejtësia ndaj UÇK-së”, morën pjesë disa anëtarë të klubit për të ngritur zërin kundër padrejtësive që po u bëhen çlirimtarëve nga Gjykata Speciale në Hagë.

Kështu, edhe sezoni i vitit 2025 mori përmbylljen e vet me organizimin e Festës së Flamurit dhe Ditës së Pavarësisë së Shqipërisë, si dhe me darkën e fundvitit më 29 nëntor 2025. Në këtë përmbyllje morën pjesë shumë anëtarë të klubit nga të katër anët e Zvicrës. Pas një periudhe të caktuar, sipas rregullores së klubit, u dorëzuan jelekët e klubit për shumë anëtarë të rinj që ishin pranuar në fillim të këtij viti.